2025-жылдын 30-июнунан тартып Россия Федерациясында чет элдик жарандар үчүн жаңы эрежелер күчүнө кирди. Эми көптөгөн чет өлкөлүк жарандар өз сапарын атайын тиркеме аркылуу алдын ала каттоодон өткөрүүгө милдеттүү. Кимдерге бул талап милдеттүү жана кимдерге тиешеси жок экенин карап чыгабыз.

2025-жылдын 30-июнунан күчүнө кирген өзгөрүүлөр

• Визасыз өлкөлөрдөн келген чет элдик жарандар өз сапары жөнүндө “Госуслуги RuID” тиркемеси аркылуу алдын ала билдириш керек.
• Каттоодон өткөндөн кийин сизге чек арада көрсөтүлчү QR-код берилет.
• Орусияга кирерден кеминде 72 саат мурда каттоодон өтүү зарыл.
• Өзгөчө кырдаалдарда (оору, тууганынын каза болушу) арызды келгенге 4 саат калганда тапшырууга болот.

2025-жылдын 30-июнунан тартып Россияга кирүү эрежелери түп-тамырынан өзгөрөт. Эми Россия Федерациясына визасыз кирген бардык чет өлкөлүк жарандар атайын тиркеме аркылуу алдын ала каттоодон өтүп, QR-код алышы керек болот. Бул кодсуз өлкөгө кирүүгө мүмкүн эмес. Бул талаптар өзгөчө визасыз режимде Россияга көп барган постсоветтик өлкөлөрдүн жарандарына тиешелүү.

Бул демилгенин негизги максаты — “миграциялык коопсуздукту жогорулатуу жана Россияга өзгөртүлгөн же жасалма жеке маалыматтары бар адамдардын кирүүсүн алдын алуу”. Биометрия чогултуу жасалма документтер менен кирүүгө аракет кылган кылмышкерлерди тосуп калууга жардам берет.